همسات

إللي ع البر عوام

بقلم أبوعدنان

إللي ع البر عوام
كنا بنرسم سوى الأحلام
علشانك اتعلمت الغطس
لا كان هاممني الموج
ولا إني أموت و افطس
عفي و قوي وكني ما بحس
وكل ما أقع أقوم اوام
واللي ع البر عوام

الموج يحدفني و ياخدني
لبحر غويط غويط
وامي كانت بتنصحني
يابني خليك حويط
ياواد ما تباقش عبيط

ومن حروفي بنيت لك قصر و بيت
اتاريني حالم و عايش في أوهام

صحيح إللي ع البر عوام

الناس واقفين ع الشط بيصقفو

كل ما أرفع رأسي يفرحو يرقصو و يهيصو

وصنعت من حبك مجداف

لجل ما ارجع بسلام

قصتنا رويتها بدموعي الحزينه

كنت فاكرك الشراع و السفينة

طوق نجاة
ياخد بادينا لبر امان

أنا مش نظره و ابتسامه

والحب لية علامة
مش كلمه تتقال وقت الصفا

ولا طيف و خيال يظهر و فجأة اختفى

وما فهوش كل حاجه بكام

واللي ع البر عوام

لو بايعاني قولي و ما تنكسفيش

ياما قولت لك الحياة من غيرك ما تساويش
باقي ع الملح و العيش

مشيتي ورى  ظنونك

فاكراني بحب غيرك و بخونك

إتحملت عصيانك و جنونك

ومرارة الأيام

صحيح إللي ع البر عوام

فية أية تاني ما قولتوش

يعني ايه أموت و لا أعيش

ولا افضل ف أحزاني
ياحبيبتي أنا مش حمل جرح تاني

كتر الجرح أساني

وحياتي كلها عذاب وآلام
واللي ع البر عوام

الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق