فبراير 3, 2023

جريدة الحياة نيوز

رئيس مجلس الادارة : نسرين رمزي

الست المبسوطة

“”””قصة قصيرة””””
بقلم خالد كامل
متعود من زمان كل ما يجي ميعاد قبض المرتب انزل وسط البلد بعد الشغل وانا متشيك علي الاخر وعلي سنجة عشرة واخر أنتكة علشان اروح اشرب قهوتي في “جروبي”
بس النهاردة كان يوم مختلف وغير عادي والحكاية إن الترابيزة اللي قدامي قعدت عليها سيدة في منتهي الشياكة وتقريبا في العقد الرابع من العمر ومش باين عليها سنها خالص من كتر إهتمامها بنفسها وأناقتها الغير عادية والغريب إنها طلبت من الويتر نفس الاوردر بتاعي..(قهوة سادة بن فاتح) وبالصدفة الغريبة برضه إن القهوتين جم في نفس التوقيت علشان نشربهم وكانت طول ماهي قاعدة قدامي ترفع نضارتها الشمس السودا بايدها لغاية حواجبها وكانت سعيدة قوي وبتبتسم طول ماهي قاعدة ومش عارف علي ايه؟؟؟ بس الحقيقة إن أنا كنت في منتهي السعادة جدا برضه بابتسامتها اللي تجنن العقل ديه وخلاص رحت أميل علي الويتر ولسه هااقوله حساب ترابيزة الهانم عندي
وقبل ما اخلص كلامي. حضر للاسف الراجل اللي كانت مستنياه وخرجت معاه بعد ما مسكت أيده وطلع محفظته ودفع حساب قهوتها اللي شربتها وكانت مبسوطة علي الاخر وفي السعادة التي لا توصف
وانا للاسف بعد ما شربت قهوتي السادة لوحدي من سكات.. روحت البيت أنام وأحلم
“بالست المبسوطة”
“””انتهت”””