أكتوبر 16, 2021

جريدة الحياة نيوز

رئيس مجلس الادارة : نسرين رمزي

دكتور محسن الفقى : “سياسات تداول الأدوية واستخدامها داخل المنزل”

دكتور محسن الفقى
استشارى طب الأطفال
موضوع طويل شوية لكن مهم جدااا سميته (سياسات تداول الادوية واستخدامها داخل البيوت)..ركزوا معايا 👀
1_ أولا وانتى مع الدكتور فى العيادة ركزى فى الأدوية واأنواعها وتركيزها ومن حقك تسألى عن مضاعفاتها أو تفاعلاتها مع بعض أو مع الأكل وطريقة إعطائها وأوقاتها سواء بالساعة او عدد المرات (بس بلاش ترغى كتير .. إسالى على المفيد وبس.😅
2_طلعتى من العيادة ومعاكى موبيل بكاميرا صورى الروشته واحفظيها عندك ولو تعرفى تعملى ملف الكترونى ع الموبايل أو ملف بلاستيك تحتفظى فيه بورق الروشتات والتحاليل والأشعة لكل طفل يبقى افضل كتير.
 
3_ روحتى الصيدلية إتاكدى من الأدوية وتركيزاتها وطريقة إعطائها واذا كان بديل يا ريت يكون نفس الاسم العلمى واعرفى طريقة حل الدوا ، خاصة المضادات وكمية الميه اللى هتضاف له واذا كان بيبوظ برة التلاجة ولا لاء ومدة استعماله وأبوس اديكم بلاش تنسوا الروشته فى الصيدلية أو تحطوها جوة كيس الدوا😅
4_ روحتى البيت طلعى الدوا واحد واحد وراجعيه على الروشته وشوفى إيه إللى هيتحل وايه اللى هتحطيه فى التلاجه والجماعة الفلاسفة اللى بيحبوا يقرأوا البامفلت اللى جوه الدوا والنبى بلاش تعملوا دكاترة وتخافوا تدوا الادوية عشان فيها حاجات خطيييييرة اووووى انتوا كنتم بتكشفوا عند دكتور 😈
5_لو فيه ابر مكتوبة فى الدوا يا ريت تعملوا اختبار الحساسية لو أول مرة وتتأكدوا من الجرعة وياريت اللى بيدى الإبرة يديها فى الفخد الأمامى خاصة فى الأطفال قبل خمس سنين وبلاش اللى فى الاليا ويا ريت من الأول تحاولوا تخلوا الدكتور يكتب شراب افضل لانكم ديما فاكرين ان الابر بتجيب من الاخر.. كل حالة لها ظروفها.. وياريت لو بتدوا ابر فى البيوت تبقوا تحتفظوا بالسرنجات المستخدمة فى جركن بلاستيك عشان العدوى🙏🙏
6_ طيب ادوية الشرب أولا بلاش تدوا بغطا الإزازة ابوس اديكم 😡..ادوا بسرنجة الدوا أو بالغطا البلاستيك المدرج بالسنتيمتر ، وتدوا الدوا شوية بشوية وافصلوا بين كل دوا ع الأقل بعشر دقايق ولو الطفل رجع الدوا مباشرة استنى شوية وعيدى نفس الجرعة اما لو رجع بعد فترة من 15 الى 30 دقيقة بلاش لان غالبا الدوا بيكون ساب المعدة ، وبعد ما تخلصى حطى غطا الدوا كويس واغسلى الغطا البلاستيك أو السرنجة اللى اديتى بيهم .
7_ يا ريت كل مرة بتدى الدوا اتاكدى من إن اللون متغيرش وإن الكمية اللى موجودة فى الازازة هية اللى انتى سيباها بدل ما العيال تكون من وراكى شربوا الدوا وانتى متعرفيش😁 وبلاش تخلطى الدوا بعصير او تزودى المية الا لما تخدى رأى الدكتور.
8- يا ريت تقللى من حفظ كل الادوية فى رف التلاجة الا اللى مضطرة تحطيه زى المضادات أو أدوية الشرب اللى بتبوظ بالحرارة وحاولى تعملى دولاب خشب أو ألوميتال صغير تحطى فيه الدوا ويكون فى مكان رطب وبعيد عن ضوء الشمس وبعيد عن متناول الأطفال عشان نقلل من حوادث التسمم بالأدوية.
9_ لو حصل اسهال شديد أو طفح جلدى أو أعراض جديدة يا ريت تروحى بسرعة تانى يوم للدكتور عشان يشوف ده من الدوا ولا تطور فى الحالة👍
10_ التزمى بميعاد المراجعة وروحى اطمنى على ابنك يا ريت وانتى رايحة ابوس اديكى بلاش تخدى كيس الدوا معاكى صورى الادوية اللى عندك بالموبايل وماتنسيش الروشته وروحى المراجعة 👍
دى أهم عشر نقاط يا ريت نلتزم بيها عشان خاطر ولادنا ، ربنا يحفظهم ويبارك فيهم