يناير 28, 2023

جريدة الحياة نيوز

رئيس مجلس الادارة : نسرين رمزي

عفواً لقد نفذ رصيدكم (مشاعر أنثي)…!

بقلم الكاتب /أشرف فتحي عبد العزيز
هقولك انا كنت ايه وبقيت ايه، وإزاي رصيدي معاك انتهى يمكن تحس او تعرف يعنى ايه معنى الندم ، وقت ما حبيتك كنت رسمه في خيالي لوحة حب كلها الوان فرح مفهاش نقطة حزن ، كان قلبي شايل ليك جواه مشاعر وأحاسيس جميلة مرسومه بكل أشكال الحب ، كنت فاكرة إنها هتكبر وهتزيد معاك ومش هتساع قلبي ولا حتى الكون ….!
كنت دائماً بقولك أنا بحبك اكتر من الحب اللي في قلبي واكثر من روحى ومن نفسي ، ايوة أنا كنت للأسف بحبك كدة بجد ، كنت مخلصة اوي معاك، حبيتك بكل حاجة حلوة جوايا علشان اخبي عن قلبي عيوبك ويأمن ليك ، ولا لحظة فكرت إنك ممكن توجعني او تبعد عني أو حتى اعرف معاك في يوم شكل الحزن ….!
بس مع الوقت طلعت أحلامي وهم وعرفت معاك يعني ايه الوجع والحزن، يعني ايه الخسارة والندم وحسرة القلب ، وعرفت يعني إيه بنام ودموعي على خدي، لأني فعلا غرقت في دموعي منك ، مبقتش بتفارق عيني لا ليل ولا نهار…!
وحبك الكبير جوايا فضل ينقص يوم بعد يوم ، لحد ما الحزن ملاه وطلعت مني وأنت كاسر قلبي، وكل حاجة حلوة جوايا انطفت وسكن مكنها الوجع والحزن، واتبدلت لوحة الفرح بلوحة حزن كلها دموع متلونه بألوان السواد….!
وضاع رصيد الحب اللى كنت فاكرة هغرق فيه بالفرح والضحك معاك ، وبدل ما يزيد الفرح زاد الوجع، وفضلت تخنق في قلبي لحد ما مات وراح عمرى في وهم الحب ، وانتهت حكايتي ، بعفواً لقد نفذ رصيدكم …!