نوفمبر 27, 2021

جريدة الحياة نيوز

رئيس مجلس الادارة : نسرين رمزي

خيال مآته.. يقلم وحيد علي الجمال

خيال مآته
كنت فاكر أنه ذكرى
راح لحاله واندثر
شوفته واقف في شموخه
كيف يكون زي الأثر
كان حقيقي من بعيد زي البشر
لسه فارد في جناحاته
كان بيضحك مش كِشِر
كنت حاسس أنه صاحبي
مش عصايه من خشب
كل تفصيله ف حاجاته
هي.. هي
البيجامه والعبايه والطاقيه
بس شكله ف الوجاهه
لاااا حكاية
شكله عمدة أو ابن بيه
جاي من عصر الجبايه
شكله يشبه للغفير
يشخط وينطر في الخلايق
و احلى حاجه بتعجبه
لون قفايا
تشوف عبايته ووقفته
تقول دا شيخ لكن أراري
ماشي ورا سلطان ضلالي
الحرام والحلال عنده عادي
شكله طيب
والطيابه في الزمان ده
واحدة ثيب الكل سبها
لاجل مايعيش في الخباثه
شكله صول هو صول
كنت عارفُه كان معفن
و السفاله ساكنه خاشمه
كان بيشتم وقت توزيع الجرايه
هو واحد من جنودنا
عارف ايه فضل البياده
الجيش ده طاعه مش سياده
لاااا موظف مرتشي
كل حاجه وليها سعر
والدولاب مليان هدايا
أو روتيني و الرتابة في المعامله
شيء اساسي
بس تعرف انت اطيب حد شفته
عايش الدنيا ببساطه
حضنه مفتوح للجميع
إن كان مزارع ولا بيه
الكل عنده شخص واحد
مفيش وسايط أو باريه
ايوه عارف انت ايه
انت ثابت زي ما انت
خيال مآته
بنخَوِف العصفورة بيك
بس لو عارفَة حقيقتك
تيجي تعملها عليك
تشبه كتير م اللي بيعَدوا عليك
كام خيال مآته كانوا وفاتوا بينا
الشكل واحد بس معصوبه العنين
ملعون ابوكي ياظروف
لما تبقى الست حاكمه في البيوت
أصبح قرارها كله يدخل جوه نفسه
في سكوت
الف ألف خيال مآته ف البيوت
هي في البيت المُحاسب
كنت فين وجيت منين
انت نازل عشان تصلي
خُد زبالة البيت معاك
وانت جاي هات وهات
اوعى تنسى أي حاجة م الحاجات
انت تسمع ماتش كورة
ويا حلة محشي حلوة
اوعى مرة تيجي يعني وتعاتبني
الوقت فات..
انت بالنسبالي ماضي وذكريات
لسه عايش ايوه عايش
بس لسه خيال مآته
وحيد علي الجمال