يناير 28, 2023

جريدة الحياة نيوز

رئيس مجلس الادارة : نسرين رمزي

“أنا آسف أنا المغرور”

 

أحمد حامد عليوه 

ومين فى الدنيا دى تحبيه ما يتغرش
أنا اسف لكن معذور
ومين فى الدنيا دى شافك ومايحبش
لقيتك ورده مزروعه فى وسط الشوك بحنيه
كأنك شمس حبيتها وماحلمتش تكون ليه
وفجأه لقيتها قدامى
دفاها ونورها علشانى
تلف مدارها حواليه
وتعزف أحلى أغنيه
ونورها فى بياض الثلج
ووقت الحر ماتضرش
قوليلى انتى ازاى بقى أصدق ده وما اتغرش
لقيتك نغمه مكسوفه
مابين أجمل كمانجه وعود
كأنك نغمة الدنيا بتيجى وبس للموعود
ملاك نازل على اسمى
بيهمسلى
يقولى كلام مافيش فى الدنيا زيه كلام
بصوت لو عدى ع الدنيا
كلام الكون بعده خلاص ما بيهمش
قوليلى انتي ازاى بقى أسمع ده وما اتغرش
لقيتك بسمه جايه لناس بتبكى من عينيها الدم
لقيتك فرحه جايالى بتمسح أى لحظة هم
كأن الفرح فى الدنيا بيتجمع فى ضربة حظ
وعملو السحب وانا اللى كسبت
وفرح الدنيا بقى ملكى
وهى الفرحه دى فجأه مابتخضش
قوليلى انتي ازاى بقى افرح اوي وما اتغرش
لقيتك حضن مش راضى بسره يبوح
كأن حنانه كان فيضان سفينة نوح
معاكى أمان بيحكو عنه فى الحواديت
بقاله سنين
عجايب الدنيا مش سبعه
معاكى كملوا السبعين
حصدت الزرع اللى عاش طول عمره ما اخضرش
قوليلى بقى اعيش ازاى وما اتغرش