فبراير 3, 2023

جريدة الحياة نيوز

رئيس مجلس الادارة : نسرين رمزي

رسالة مؤثرة من السعدني لطليقته بعد وفاتها المفاجئة متابعة سامية عشماوي

 

نعى الفنان أحمد السعدني طليقته التي وافتها المنية بأزمة قلبيه مفاجئة،حيث تلقى نبأ وفاتها أثناء حضوره برفقة ولديه” آدم وياسين” حفل الفنانة العالمية” جينفر لوبيز”.

وقال السعدني : “عمري في حياتي ما أتكلمت عن حياتي الشخصية لكن حسيت أني لازم أعمل كده دلوقتي
فذكر إن الذكري تنفع (المؤمنين)
أو الكافرين أو المستهبلين أو تنفع اي حد ححس إني عملت حاجة .

ححاول مطولش يوم ٩/٩/٢٠٠٣ حب من أول نظره في الشارع ما بين معهد السينما حيث كانت تدرس و معهد فنون مسرحية حيث كنت الهو و أدرس برضه ميضرش كنت راكب عربية و كانت ماشيه علي رجلها كنت حخبطها لكن حصل خير لا محصلش قوي خبطتتي هي في قلبي حب تقطيع شرايين سنه خطوبة سنه كتب كتاب شهر جواز خلفه أول ولد هنا بدأت المشكلة اللي بكتب الكلام ده عشانها
أنا زي كتير للأسف شباب anti تحمل مسئولية بص لنسب الطلاق و أنت تفهم أنا بيجيلي ارتيكريه لما احس أني مسئول و هي برضه حبيبتي زي بنات كتير بتقول طلقني أكتر مبتنطق اسمي كانت النتيجه في أول سنه بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي أول طلقة
قشطه يا باشا عشت حياتك ؟ اه …ارتحت ؟؟ لا 
وحشتني وحشني حنيتها و حبها و هبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني لا تصدق نفعت الجانب الأناني في شخصيتي غلبني يا عم كبر مخك و عيش حياتك المشكله اني عمري مارتحت كنت عايز حضنها و حنيتها و هبلها بس كنت بأجل الرجوع يمكن اكبر او اعقل او اقدر اتحمل المسئوليه بجد حددت لنفسي سن معين ارجعلها فيه قال يعني حبقي نضجت بس ملحقتش
ماتت في لحظه كانت بتكلمني قبلها بساعه و مكنتش عيانه كان عندها ضغط زي اغلب الشعب المصري الحمد لله 
ماتت و مشيت و قررت تسبني للابد كنت فاكرها حتستناني و متاكد من ده مستحيل تحب حد غيري مجاش في بالي أنها ممكن تموت دلوقتي صغيره و أكتر واحده في حياتي شفتها بتحب الحياه و عندها طاقة ايجابيه.

ماتت و سابتلي الولدين و الندم 
أنا متاكد انك في الجنه رحتي للي خلقك يوم عرفه و اميره و ست البنات و الستات و نضيفه و كريمه و صنتي ولادي و بيتي 
بحبك يا امل حياتي اللي اتهد و بوعدك المرادي حشيل المسئوليه للاسف اتعلمت الدرس بس بعد ما اتحرمت من حنيتك و حضنك و ولادك كمان اتحرموا من احن ام

ربنا يقدرني و اربيهم احسن ما كنتي عايزه بحبك و مش بطلب منك غير انك تسامحيني 
ربنا يرحمك و يرحمني و يرحم ولادنا يا حبيبة عمري الوحيده.
الجدير بالذكر ان السعدنى اعلن في وقت سابق انه انفصل عن زوجته دون ذكر اسباب الانفصال.